Ku Ngoro y’Amateka y’Urugamba rwo Guhagarika Jenoside iri mu Ngoro y'Inteko Ishinga Amategeko hafunguwe imurika ry'igihe gito ryiswe Isaliyuti rigizwe n'ibihangano bishushanyije bigaruka ku mateka yo kubohora Igihugu no guhagarika Jenoside yakorewe Abatutsi. Ibi bihangano bigaragaza amateka yo guhera igihe cyo kuva mu buhungiro kugeza igihugu kibohowe n’Ingabo zari iza FPR Inkotanyi. Hagaragazwamo kandi n’aho igihugu kigeze uyu munsi kiyubaka.

Ni igikorwa cyabaye ku mugoroba wo kuri iki Cyumweru tariki ya 10 Nyakanga 2022.

Imurika ry'ibihangano bigize Isaliyuti ryakozwe n'umunyabugeni ukiri muto witwa Ngabo King, afatanyije n'abandi banyabugeni bane (4) bose biga mu Ishuri ry'Ubugeni n'Ubuhanzi riherereye ku Nyundo mu Karere ka Rubavu.

Tubahaye ikaze mu Nngoro y’Amateka y’Urugamba rwo Guhagarika Jenoside, aho mushobora no gusura imurika ry'ibihangano bigize Isaliyuti. Iri murika rikaba rizamara amezi atandatu (6) muri iyi ngoro.