Ku wa gatanu tariki ya 29 Kanama 2025 ku Ngoro y’Umurage w’Amateka y’Imibereho y’Abanyarwanda iherereye mu Karere ka Huye, habereye ibirori ngaruka mwaka byo kwizihiza Umuganura w’abana, ni ibirori byizihijwe ku nshuro ya gatatu (3) kuko watangiye kwizihizwa guhera mu wa 2022. Ibi birori bihuza abana n’ababyeyi baturuka hirya no hino mu gihugu hagamijwe kuganura ku byo abana baba bamaze iminsi batozwa ku ngoro z’umurage mu gihe bari mu biruhuko bisoza umwaka.

Mu byo abana batozwa bakabiganuza ababyeyi harimo imbyino nyarwanda: nk’umushagiriro, umushayayo, guhamiriza, kuvuza ingoma; harimo kandi ubuvanganzo, imikino gakondo, ururimi rw’ikinyarwanda, imyuga gakondo n’ibindi batozwa mu rwego rwo kubafasha gukurana indangagciro ziri mu murage ndangamuco w’Igihugu.

Mu kwakira abashyitsi muri ibi birori, abana bo mu Itorero Urugangazi nibo babimburiye abandi, bakiriza ababyitabirye umurishyo w’ingoma ndetse n’Itsinda rya Muzika “Umuti mu Nganzo” rikorera mu Karere ka Nyarugenge rishyushya igitaramo mu ndirimbo n’imbyino gakondo.

Muri ibi birori, abana baturutse ku Ngoro y’Ubuhanzi n’Ubugeni iherereye mu Karere ka Kicukiro, iy’Abami mu Rukari n’iy’Umurage wo Kwigira ziherereye mu Karere ka Nyanza ndetse n’iy’Umurage w’Amateka y’Imibereho y’Abanyarwanda bahawe umwanya baganuza ababyeyi n’abakunzi bibirori by’umuco gakondo ku byo batojwe muri gahunda y’Ibiruhuko mu Ngoro z’Umurage.

Nyakubahwa Intebe y’Inteko Amb. Robert Masozera wari umushyitsi mukuru, yashimiye abafatanyabikorwa bose bakomeje kugira uruhare muri iki gikorwa yemeza ko kizakomeza. 

Mu ijambo rye kandi yagarutse ku bushakashatsi Inteko y’Umuco iri gukora ku murage ndangamuco w’u Rwanda. Yagaragaje ko ubu bushakashatsi bwerekana ko Abanyarwanda bangana na 88% ari bo bazi indangagaciro z’umuco nyarwanda mu gihe abangana na 68.6% ari bo bonyine batozwa indangagaciro z’umuco nyarwanda mu muryango. 

Ubu bushakashatsi kandi bugaragaza ko indangagaciro yo kwiyubaha no kwihesha agaciro biri mu ndangagaciro z’umuco abanyarwanda bagenda bateshukaho.

Yisunze ubu bushakashatsi yakanguriye ababyeyi n’abafatanyabikorwa kugira uruhare mu kuzamura ibi bipimo hagamijwe kubaka umuryango nyarwanda ugendera ku ndangagaciro z’umuco.

Mu ijambo rye, Bwana MURENZI Albert wavuze mu izina ry’ababyeyi bafite abana bitabiriye gahunda y’abana mu biruhuko mu ngoro z’umurage, yashimiye Inteko y’Umuco yateguye iyi gahunda ndetse ikanashyiriraho abana umwanya wo kwizihiza Umuganura wabo, yaboneyeho gusaba ko iyi gahunda yahoraho bigizwemo uruhare n’ababyeyi, abayobozi n’abafatanyabikorwa, yasabye ko ibyo abana bigishijwe byakomeza gushyigikirwa bashyirirwaho amarushanwa ajyanye n’umurage ndangamuco mu mpande zose z’igihugu. 

Akayo Carla Maela wavuze mu izina ry’abana bitabiriye gahunda y’ibiruhuko mu ngoro z’umurage muri uyu mwaka, yashimiye ubuyobozi bw’Igihugu budaheza abana, bakabaha umwanya bakiga umuco nyarwanda. Akayo yasabye ababyeyi ko bakomeza gushyigikira uburezi bw’abana bashyigikira gahunda yo kugaburira abana ku ishuri izwi nka “Dusangire Lunch”.

Nyuma yo gutaramira ababyeyi mu ndirimbo n’imbyino gakondo binogeye ijisho, umuhamirizo w’intore ndetse n’ibisakuzo, hakurikiyeho guhemba abana bitwaye neza bagatsinda amarushanwa ku nkoranabuhanga ya terefoni yigisha Ikinyarwanda yitwa “TUMENYE IKINYARWANDA”, aya marushanwa yateguwe ku bufatanye n’Urwego rw’Igihugu rushinzwe Uburezi bw’Ibanze (REB) n’IntekoyUmuco mu gihe cy’ibiruhuko.

Abana batsinze aya marushanwa bane ba mbere ku rwego rw’igihugu bahembwe mudasobwa ngendanwa (Laptops), ibitabo n’icyemezo cy’ishimwe.

Umuganura w’abana 2025 wasojwe no gusura ibyo abana bigishijwe gukora muri gahunda y’abana mu biruhuko mu ngoro z’umurage. Guhera umwaka wa 2023, abana batangiye kugira umwanya wihariye mu kwizihiza uyu munsi mukuru, ugahuzwa no gusoza gahunda y’abana mu biruhuko mu Ngoro z’Umurage izwi mu ndimi z’amahanga nka “Holidays in Museum.”