Kuri uyu wa 07 Kanama 2026, mu Karere ka Rusizi, Umurenge wa Rwimbogo, habereye ibirori byo kwizihiza umunsi mukuru w’Umuganura ku rwego rw’Igihugu. Mu ijambo yagejeje ku bitabiriye ibi birori, Minisitiri w’Ubumwe bw’Abanyarwanda n’Inshingano Mboneragihugu, Dr. Bizimana Jean Damascène, yagaragaje ko umuco ugomba gusigasirwa, ashimangira ko igihugu kibeshwaho n’umuco wacyo. Yemeza ko kugira imyitwarire itajyanye n’indangagaciro ari byo biri kwangiza umuryango, bikaba n’aho haturuka ikibazo cy’abakoresha ibiyobyabwenge, ingengabitekerezo mbi y’uburumbo, ubusinzi, n’ubwomanzi.

Minisitiri Dr. Bizimana yibukije abaturage ko bibabaje kubona u Rwanda rwiyubatse nyuma yo gushegeshwa na Jenoside yakorewe Abatutsi, ariko rukaba rwongera guhomba abaturage barwo bazonzwe n'inzoga z'ibyuma n'izindi nzoga z'amakorano zitujuje ubuziranenge. Yasabye abaturage kutareberera ibikorwa nk'ibyo ahubwo bakarangwa n'ubupfura n'ubwangamugayo.

Na ho Komiseri wa Polisi y'u Rwanda ushinzwe guhuza ibikorwa bya Polisi n'abaturage, ACP Ruyenzi Theddy, yashimangiye ko kunywa ibiyobyabwenge byangiza ubwenge bw'abantu, bigabanya umusaruro w'umurimo, bikongera no gusesagura ibyari byagezweho.

Meya w'Akarere ka Rusizi, Sindayiheba Phanuel, na we yagaragaje imbogamizi ziterwa n'ibiyobyabwenge n'inzoga zitemewe mu karere ayobora, ashimangira ko hari inganda zafunzwe ndetse n'urubyiruko rwugarijwe n'ubu burwayi bushingiye ku businzi. Yatanze urugero rw'abamaze gufashwa kuva mu bigo ngororamuco ndetse n'abandi bagikenye ubufasha bwo gusubira mu buzima busanzwe.

Ibi birori byabaye umwanya mwiza ku baturage wo kwisuzuma, guhana imbaraga, no kongera kwibutswa ko Umuganura ukwiye kuba isoko nyayo y'ubumwe, ubudaheranwa, no gukunda umurimo hagamijwe kwigira no kwubaka u Rwanda ruteye imbere.

Mu mateka y’u Rwanda, Umuganura ni umunsi mukuru ukomeye ugenga imibereho y’Abanyarwanda n’imitegekere y’Igihugu cyacu, ugashimangira ubumwe bwabo, ubuvandimwe n’ubufatanye mu kwishakamo ibisubizo. Kwizihiza Umuganura ni igikorwa cyo kwishimira no gusangira umusaruro wagezweho no gufasha abaturanyi batashoboye kugera ku musaruro wifuzwa.

Mu nsanganyamatsiko igira iti: “Umuganura, isoko y’ubumwe n’ishingiro ryo kwigira”, ibirori byo kuwizihiza ku rwego rw’Igihugu byabereye mu Ntara y’Uburengerazuba, mu Karere ka Rusizi, ariko   kandi wanizihirijwe ku rwego rw’Uturere, imidugudu ndetse no mu miryango.