None kuwa 28 Gicurasi 2025, u Rwanda rwizihije Umunsi Mpuzamahanga w’Ingoro z’Umurage. Ni birori byabereye ku Ngoro y’Umurage w’Ibidukikije iherereye mu Ntara y’Iburengerazuba, Akarere ka Karongi, mu Murenge wa Bwishyura. Uyu Munsi usanzwe wizihizwa ku rwego rw’isi ku wa 18 Gicurasi buri mwaka.

Muri uyu mwaka wa 2025, umunsi wahariwe Ingoro z’Umurage uri kwizihizwa hagendewe ku nsanganyamatsiko igira iti“Ahazaza h’Ingoro z’Umurage mu Kwihutisha Impinduka mu iterambere”. 

Iyi nsanganyamatsiko ikaba yaremejwe mu rwego rwo gukomeza gushyigikira intego z’iterambere rirambye z’Umuryango w’Abibumbye ndetse na Gahunda ya Kabiri y’Igihugu yo kwihutisha iterambere NST2.

Mu ijambo rye, Eric MAHORO Umunyamabanga Uhoraho muri Minisiteri y’Ubumwe bw’Abanyarwanda n’Inshingano Mboneragihugu wari umushyitsi mukuru muri ibi birori, yagarutse ku kamaro k’ingoro z’umurage ndetse n’impamvu u Rwanda rwizihiza uyu Munsi. Ati: “Kwizihiza Umunsi mpuzamahanga w’ingoro z’umurage ni umwanya wo kuzirikana akamaro k’ingoro z’umurage mu kwihutisha iterambere, guhanga udushya no gutanga amahirwe y’akazi.”

Hashimwe uruhare ingoro ndangamurage zikomeje kugira mu iterambere ry’igihugu rigaragarira ku mubare wabazisura ukomeje kwiyongera kandi umubare wabo munini akaba ari abanyarwanda ndetse no kuba zikomeje kuba umuhuza w’inzego zose yaba iza Leta, abikorera, abaterankunga, abashakashatsi n’umuryango nyarwanda muri rusange.

Uretse ubutumwa bushima uruhare rw’ingoro z’umurage mu ngeri z’ubukungu, imibanire no gusigasira umurage, abitabiriye ibi birori barimo abafatanyabikorwa basurisha bamukerarugendo, abikorera ndetse n’inzego z’ubuyobozi bakanguriwe kubyaza umusaruro amahirwe ari mu murage w’igihugu bakangurira abantu gusura ingoro z’umurage n’ahantu ndangamurage.

Ibirori byo kwizihiza Umunsi Mpuzamahanga w’Ingoro z’umurage byabanjirijwe n’inama nyunguranabitekerezo yahuje Inteko y’Umuco n’abafatanyabikorwa bayo yari igamije kwiga ku mushinga w’ikigo ndangamuco cya Nkombo mu Karere ka Rusizi, ni umushinga uzibanda ku kumurika umurage n'umuco biboneka mu birwa biri hirya no hino mu biyaga by'u Rwanda by’umwihariko ibyo mu kiyaga cya Kivu. Ni nama nyunguranabitekerezo yateguwe kubufatanye n’Intara y’Iburengerazuba yari ihagarariwe n’Umunyamabanga Nshingwabikorwa wayo, Madamu UWAMBAJEMARIYA Florence.

Mu rwego rwo kwizihiza Umunsi Mpuzamahanga w’Ingoro z’Umurage kandi Inteko y’Umuco n’abafatanyabikorwa bayo basuye ahantu ndangamurage hagamije kuhamenyekanisha, gusobanura amateka y’aho ndetse no gukangurira abantu kuhabungabunga no kuhabyaza umusaruro. Mu hasuwe hakaba harimo: Ku Gicumbi cy’Ubunyarwanda i Nyange haherereye mu Karere ka Ngororero, mu Musaho no ku Nteko mu Karere ka Karongi. Ni bikorwa byuzuzaga gahunda yo gufungurira ingoro z’umurage kubashaka kuzisura ku buntu byakozwe ku ngoro zose uko ari umunani (8) zigengwa n’Inteko y’Umuco.

Inteko y’Umuco ikaba ikomeje gukangurira abantu bose gusura ingoro z’umurage kugira abantu bose basobanukirwe n’umurage uzimuritswemo.